वाम गठबन्धनले कैलालीमा उम्मेदवार टुंगो लगायोः प्रतिनिधि सभाका तीन सिट एमालेलाई, दुई माओवादीलाई

धनगढी, कात्तिक १३ । नेकपा एमाले–माओवादी केन्द्रको वाम गठबन्धनले कैलाली जिल्लामा उम्मेदवारको नाम टुंगो लगाएको छ । एमाले नेता तथा पूर्वसभासद् नारदमुनी रानाका अनुसार प्रतिनिधि सभा सदस्य निर्वाचनको प्रत्यक्षतर्फ कैलाली निर्वाचन क्षेत्र नम्बर १ मा एमालेबाट गरिमा शाह, २ नम्बर क्षेत्रमा एमालेकै झपट रावल, ३ नम्बर क्षेत्रमा माओवादी केन्द्रका पूर्व कृषि मन्त्री गौरीशंकर थारुलाई चयन गरिएको छ । त्यस्तै, ४ क्षेत्रमा माओवादी केन्द्रको पोलिट्ब्यूरो सदस्य लेखराज भट्ट चयन भएका छन् । भने निर्वाचन क्षेत्र नम्बर ५ बाट एमालेको पूर्वसभासद नारदमुनि रानालाई चयन गरिएको छ ।
उक्त गठबन्धनले प्रतिनिधि सभा सदस्यको लागि उम्मेदवार टुंग्याएपनि पनि प्रदेश सभाको लागि भने छलफल जारी रहेको जनाइएको छ । तर आजै कैलालीसहित प्रदेश नम्बर ७ को ५ जिल्लामा मंसिर २१ गते हुने निर्वाचनको सिटबाँडफाँड संगै उम्मेदवारहरुको नाम टुंगो लाग्ने जनाइएको छ । प्रदेश सभा सदस्य निर्वाचनको लागि वाम गठबन्धनबीच कैलाली क्षेत्र नम्बर १ को ‘क’ मा माओवादी, ‘ख’ मा एमाले, क्षेत्र नम्बर २ को ‘क’ मा एमाले, ‘ख’ मा माओवादी, क्षेत्र नम्बर ३ को ‘क’ मा माओवादी, ‘ख’ मा एमाले, क्षेत्र नम्बर ४ को ‘क’ र ‘ख’ मा एमाले र क्षेत्र नम्बर ५ को ‘क’ मा एमाले र ‘ख’ मा माओवादीको भागमा परेको एमाले नेता रानाले जानकारी दिए ।
दोस्रो चरणमा मंसिर २१ गते प्रदेश नम्बर ७ को कैलाली, कञ्चनपुर, अछाम, डोटी र डडेल्धुरामा हुने निर्वाचनको लागि उक्त गठबन्धनले सिट बाँडफाँड करिब–करिब टुंग्याइ सकेको छ । जुनअनुसार कञ्चनपुर जिल्लाको ३ वटा निर्वाचन क्षेत्र मध्ये १ नम्बरमा माओवादी केन्द्रले वीना मगरलाई सिफारिस गरी सकेको छ । तर दुई वटा निर्वाचन क्षेत्र परेको एमालले भने अझै टुंग्याउन सकेको छैन ।
त्यस्तै १÷१ वटा निर्वाचन क्षेत्र रहेको डोटी र डडेल्धुरामा माओवादीले डडेल्धुरा र डोटीमा एमालेले पाएको छ । डोटीमा एमालेका सांसद प्रेम आले र डडेल्धुरामा माओवादीले खगराज भट्टलाई चयन गरिसकेको छ । भने २ वटा निर्वाचन रहेको अछामको क्षेत्र १ बाहेकमा टुंगो लाग्न सकेको छैन । क्षेत्र नम्बर १ मा एमाले उपाध्यक्ष भीम रावल पाउने भएका छन् ।
साभार:- नेपालीपत्र